சுவிட்சர்லாந்தின் பிரபலமான A1 நெடுஞ்சாலையில் உள்ள Würenlos சேவை நிலையத்தில் (rest area) தவறான முறையில் வாகனங்களை நிறுத்துவோருக்கு இனிமேல் கடுமையான அபராதம் விதிக்கப்படும் என்று நீதிமன்றம் உத்தரவிட்டுள்ளது. குறிப்பாக பேருந்துகளுக்காக ஒதுக்கப்பட்ட பார்க்கிங் இடங்களை கார்கள் மற்றும் லாரிகள் அடிக்கடி ஆக்கிரமிப்பதால் இந்த புதிய கட்டுப்பாடு கொண்டு வரப்பட்டுள்ளது.
சுவிட்சர்லாந் Baden மாவட்ட நீதிமன்றம் வழங்கிய உத்தரவின்படி, இனிமேல் அந்த பகுதிகளில் அனுமதி இல்லாத வாகனங்கள் நிறுத்தப்படுவது முற்றிலும் தடை செய்யப்பட்டுள்ளது. இந்த விதியை மீறினால் அதிகபட்சமாக 2,000 சுவிஸ் ஃப்ராங்க் வரை அபராதம் விதிக்கப்படலாம் என்று தெரிவிக்கப்பட்டுள்ளது.
இந்த ஓய்வு நிலையம் “Fressbalken” என அழைக்கப்படுகிறது. இங்கு பேருந்துகளுக்காக ஒதுக்கப்பட்ட இடங்கள் பல சமயங்களில் கார்கள் மற்றும் லாரிகளால் நிரம்பிவிடுவதால் பேருந்துகள் நிறுத்த இடம் இல்லாமல் தவிக்கும் நிலை உருவாகியுள்ளது. இது பயணிகளின் ஓய்வு மற்றும் போக்குவரத்து ஒழுங்கை பாதிக்கும் முக்கிய பிரச்சனையாக மாறியுள்ளது.
முன்பு பாதுகாப்பு பணியாளர்கள் மூலம் தவறாக நிறுத்தும் வாகனங்களை கட்டுப்படுத்த முயற்சி செய்யப்பட்டாலும் அது போதுமானதாக இல்லை என்று நிர்வாகம் தெரிவித்துள்ளது. குறிப்பாக பண்டிகை நாட்கள் மற்றும் அதிக போக்குவரத்து நேரங்களில் இந்த பிரச்சனை அதிகரிப்பதாக கூறப்படுகிறது.
இந்நிலையில் நீதிமன்றம் கடுமையான தடை உத்தரவை அமல்படுத்தியுள்ளது. இந்த புதிய விதி பல நிலப்பகுதிகளில் 20 ஆண்டுகள் வரை செல்லுபடியாகும் வகையில் அமல்படுத்தப்பட்டுள்ளது. இதன் மூலம் பேருந்துகளுக்கான இடங்கள் பாதுகாக்கப்பட்டு போக்குவரத்து ஒழுங்கு மேம்படும் என எதிர்பார்க்கப்படுகிறது.
