இந்த விவகாரத்தில் கோடிக்கணக்கான ரூபாய் முறைகேடு நடந்திருக்கலாம் என்ற குற்றச்சாட்டும் எழுந்தது. இதையடுத்து சர்ச்சைக்குரிய நூல்களை அகற்றவும், கொள்முதல் நடவடிக்கைக்கு காரணமானவர்கள் மீது நடவடிக்கை எடுக்கவும் எழுத்தாளர்கள், பல்வேறு அமைப்புகள் மற்றும் அரசியல் கட்சித் தலைவர்கள் வலியுறுத்தினர். தொடர்ந்து, கடந்த 7ஆம் தேதி அந்தப் புத்தகங்கள் அகற்றப்பட்டதாக செய்திகள் வெளியாகின.
நூல்கள் இன்னும் இருப்பதாக ஆய்வு மாணவர் குற்றச்சாட்டு
ஆனால் தமிழ் நூல்கள் பிரிவில் அகல் விளக்கு மற்றும் பீனிக்ஸ் பதிப்பகங்களின் பல புத்தகங்கள் இன்னும் இருப்பதாக முனைவர் பட்ட ஆய்வு மாணவர் பிரேம் குமார் தெரிவித்துள்ளார். ஆங்கில நூல்கள் பிரிவிலும் பீனிக்ஸ் பதிப்பகத்தின் புத்தகங்கள் முழுமையாக அகற்றப்படவில்லை என அவர் கூறியுள்ளார்.
சர்ச்சைக்குரிய அனைத்து நூல்களையும் உடனடியாக கண்டறிந்து அகற்ற வேண்டும் என்றும், இதுபோன்ற வேறு போலிப் புத்தகங்கள் உள்ளனவா என்பதை ஆய்வு செய்ய வேண்டும் என்றும் அவர் வலியுறுத்தினார். மாணவர்கள் மற்றும் போட்டித்தேர்வர்களுக்கு பயனளிக்கும் தரமான புத்தகங்கள் மட்டுமே நூலகத்தில் இருக்க வேண்டும் எனவும் தெரிவித்தார்.
வெளிப்படையான விசாரணை கோரிக்கை
தமிழ்நாடு முற்போக்கு எழுத்தாளர்கள் கலைஞர்கள் சங்கத்தின் மாநில துணைப் பொதுச்செயலாளர் அ.கரீம், நூல்கள் அகற்றம் மற்றும் அதிகாரிகள் இடமாற்றம் போன்ற பெயரளவிலான நடவடிக்கைகளைத் தவிர, இதுவரை வேறு நடவடிக்கை எடுக்கப்படவில்லை என குற்றம்சாட்டினார். முதல் தகவல் அறிக்கைகூட பதிவு செய்யப்படவில்லை என்றும் அவர் கூறினார்.
புத்தகங்களை வாங்க பரிந்துரைத்தவர்களின் பெயர்களை வெளியிட்டு, சம்பந்தப்பட்டவர்கள் மீது வெளிப்படையான விசாரணை நடத்த வேண்டும் எனவும் அ.கரீம் வலியுறுத்தினார். Periyar Library fake books விவகாரத்தில் அரசு ஏன் தயக்கம் காட்டுகிறது என்பது சந்தேகத்தை ஏற்படுத்துவதாகவும் அவர் தெரிவித்தார்.
