பொலிஸாரின் தகவலின்படி ஜூலை 23ஆம் தேதி கொழும்பு போர்ட் சிட்டி வளாகத்தில் சீனப் பிரஜைகள் அடங்கிய இரு குழுக்களுக்கிடையில் ஏற்பட்ட மோதலைத் தொடர்ந்து ஒருவர் கடத்தப்பட்டுள்ளார். பின்னர் அவர் கொலை செய்யப்பட்ட நிலையில் அவரது சடலம் எஹெலியகொட பகுதியில் கண்டுபிடிக்கப்பட்டது. இந்தக் கொலைச் சம்பவம் தொடர்பாக இதுவரை எட்டு சந்தேக நபர்கள் அடையாளம் காணப்பட்டுள்ளனர். அவர்களில் இருவர் சம்பவத்துக்குப் பின்னர் நாட்டை விட்டு வெளியேற முயன்றபோது கைது செய்யப்பட்டுள்ளதுடன் அவர்கள் முக்கிய சந்தேக நபர்களாக அடையாளம் காணப்பட்டுள்ளனர். Port City Murder
மேலும் மூன்று சந்தேகநபர்கள் ஏற்கனவே இலங்கையை விட்டு வெளியேறியுள்ளதாகவும் அவர்களை மீண்டும் நாட்டுக்கு அழைத்து வந்து விசாரணை நடத்துவதற்கான நடவடிக்கைகள் முன்னெடுக்கப்பட்டு வருவதாகவும் பொலிஸார் தெரிவித்தனர். விசாரணைகளின் போது, இந்தக் குற்றத்துடன் தொடர்புடையதாக நம்பப்படும் இரண்டு ஏர் பிஸ்டல்கள், ஒரு கைப்பேசி, ஒரு வாக்கி டாக்கி மற்றும் பல வாகனங்கள் கண்டறியப்பட்டுள்ளதாகவும் அறிவிக்கப்பட்டுள்ளது. இந்த வழக்கின் மேலதிக விசாரணைகள் இலங்கையில் உள்ள சீனத் தூதரகம் மற்றும் சீன அரசாங்கத்தின் ஒத்துழைப்புடன் தொடர்ந்து முன்னெடுக்கப்பட்டு வருவதாக DIG நிஷாந்த டி சொய்சா தெரிவித்தார்.
