1945 முதல் 1956 வரையிலான காலத்தில், ஆடம்ஸிடம் சிகிச்சை பெற்ற சுமார் 163 நோயாளிகள் மர்மமான முறையில் உயிரிழந்ததாகக் கூறப்பட்டது. அவர்களில் 132 பேர் தங்கள் சொத்துகள், நகைகள், பணம் அல்லது ஓவியங்களை ஆடம்ஸுக்கு உயிலில் விட்டுச் சென்றிருந்தனர். இதே காலத்தில் ரோல்ஸ் ராய்ஸ் கார்கள், வைர நகைகள் மற்றும் பிரமாண்ட பங்களாவுடன் அவர் ஆடம்பரமாக வாழ்ந்தார்.
எடித் மோரெல் மரணம் தொடர்பான விசாரணை
1950-ல் 81 வயதான எடித் ஆலிஸ் மோரெலுக்கு வலியைக் குறைப்பதாகக் கூறி மார்பின் மற்றும் ஹெராயின் போன்ற மருந்துகள் தொடர்ந்து செலுத்தப்பட்டதாகக் குற்றச்சாட்டு எழுந்தது. பின்னர் அவர் உயில்களை மாற்றி, தனது சொத்துகளை ஆடம்ஸுக்கு வழங்கியதாகக் கூறப்பட்டது. நவம்பர் 1950-ல் அவர் உயிரிழந்தார்; மரணச் சான்றிதழில் மூளையில் ரத்தக்கசிவு என குறிப்பிடப்பட்டது. அவரது உடல் உடற்கூறாய்வு இன்றி எரிக்கப்பட்டது.
1956-ல் கெர்ட்ரூட் ஹல்லெட் என்ற பெண்ணின் மரணத்தைச் சுற்றிய சந்தேகங்கள் காவல்துறையின் கவனத்தை ஈர்த்தன. ஸ்காட்லாந்து யார்டு அதிகாரி ஹெர்பர்ட் ஹன்னம் விசாரணை நடத்தி, ஆடம்ஸ் அதிக அளவில் மார்பின் மற்றும் ஹெராயின் வாங்கிய பதிவுகளை ஆய்வு செய்தார். இதையடுத்து டிசம்பர் 1956-ல் ஆடம்ஸ் கைது செய்யப்பட்டார்.
1957-ல் ஓல்ட் பெய்லி நீதிமன்றத்தில் எடித் மோரெல் கொலை வழக்கு விசாரிக்கப்பட்டது. 17 நாட்கள் நடைபெற்ற விசாரணையில், உடல் எரிக்கப்பட்டதால் நேரடி தடயவியல் ஆதாரம் இல்லை என எதிர்தரப்பு வாதிட்டது. வலியைக் குறைக்க வழங்கிய மருந்து தற்செயலாக மரணத்தை ஏற்படுத்தினால் அது கொலை அல்ல என்ற இரட்டை விளைவு கோட்பாடும் முன்வைக்கப்பட்டது. ஏப்ரல் 9-ம் தேதி, 44 நிமிட ஆலோசனைக்குப் பிறகு ஜூரிகள் ஆடம்ஸை குற்றமற்றவர் என அறிவித்தனர்.
போதை மருந்துகளைத் தவறாகக் கையாண்டது மற்றும் போலி சான்றிதழ்கள் வழங்கியது தொடர்பாக அவரது மருத்துவ உரிமம் ரத்து செய்யப்பட்டாலும், 1961-ல் மீண்டும் உரிமம் பெற்றார். 1983-ல் அவர் உயிரிழந்தார். Dr John Bodkin Adams case, சட்டரீதியான விடுதலைக்கும் நீடித்த வரலாற்றுச் சந்தேகங்களுக்கும் இடையிலான புதிராக இன்றும் பார்க்கப்படுகிறது.
