சர்வதேச கடத்தல் கும்பல் – யூகே யில் செயல்பட்ட சிகரெட் கடத்தல்

ஐரோப்பிய காவல் அமைப்பு Europol தலைமையில் ஐந்து நாடுகள் இணைந்து நடத்திய விசாரணையில் ஐக்கிய இராச்சியத்தை (UK) மையமாகக் கொண்டு செயல்பட்ட பெரிய அளவிலான சட்டவிரோத சிகரெட் கடத்தல் கும்பல் கண்டறியப்பட்டு ஒழிக்கப்பட்டுள்ளது. இந்த நடவடிக்கை சர்வதேச அளவில் செயல்படும் குற்றவியல் வலையமைப்புகளை கட்டுப்படுத்த முக்கியமான முன்னேற்றமாக பார்க்கப்படுகிறது.

இந்த விசாரணை 2024 செப்டம்பர் மாதத்தில் இத்தாலியின் ஜெனோவா துறைமுகத்தில் (Port of Genoa) சுமார் 12 மில்லியன் போலி சிகரெட்டுகள் கைப்பற்றப்பட்டதைத் தொடர்ந்து தொடங்கப்பட்டது.

கடத்தல் குழு சிகரெட்டுகளை கட்டுமான பொருட்கள் போன்ற பெயர்களில் தவறான சுங்க ஆவணங்களுடன் அனுப்பியதாக கண்டறியப்பட்டுள்ளது. சில சமயங்களில் மறைமுக அடுக்குகள் கொண்ட கொண்டெய்னர்கள் (containers) பயன்படுத்தப்பட்டுள்ளன.

இந்த சர்வதேச குற்ற அமைப்பு UK-ஐ மையமாகக் கொண்டு ஐரோப்பா ஆப்பிரிக்கா மற்றும் ஆசியாவிலுள்ள பல நாடுகளுடன் தொடர்புகளை வைத்திருந்தது.

சிகரெட்டுகள் அர்மேனியா, துபாய் (UAE), ஸ்பெயின் போன்ற இடங்களில் இருந்து வந்ததாக போலியான தகவல்கள் வழங்கப்பட்டு ஜார்ஜியா, கென்யா, நெதர்லாந்து, துருக்கி போன்ற நாடுகள் வழியாக கொண்டு வரப்பட்டதாக விசாரணையில் தெரியவந்துள்ளது.

2026 மார்ச் 24 அன்று நடத்தப்பட்ட ஒருங்கிணைந்த நடவடிக்கையில் இத்தாலி போலந்து மற்றும் UK ஆகிய நாடுகளில் பல சந்தேக நபர்கள் கைது செய்யப்பட்டுள்ளனர்.

சுமார் €2.5 மில்லியன் மதிப்புள்ள சொத்துகள் பறிமுதல் செய்யப்பட்டதுடன் மொத்தமாக 40 டன்னிற்கும் மேற்பட்ட சட்டவிரோத புகையிலைப் பொருட்கள் கைப்பற்றப்பட்டுள்ளன. இந்த கடத்தலால் ஐரோப்பிய நாடுகளுக்கு €10 மில்லியனுக்கும் மேற்பட்ட வரி இழப்பு ஏற்பட்டுள்ளதாக மதிப்பிடப்பட்டுள்ளது.

மேலும், கும்பலுடன் தொடர்புடைய ஐடி நிபுணர் போலியான இணையதளங்கள் மற்றும் மின்னஞ்சல் முகவரிகள் உருவாக்கி சரக்கு பெறுநர்களின் உண்மையான அடையாளங்களை மறைக்க உதவியதாக அதிகாரிகள் தெரிவித்துள்ளனர். Europol அதிகாரிகள் விசாரணைக்கு தொழில்நுட்ப ஆதரவு வழங்கியதுடன் குற்றவாளிகள் பயன்படுத்திய cryptocurrency பரிவர்த்தனைகளையும் ஆய்வு செய்துள்ளனர்.

இந்த நடவடிக்கை சர்வதேச குற்ற வலையமைப்புகள் அதிகளவில் எல்லை தாண்டி செயல்படுகின்றன என்பதையும் அவற்றை எதிர்க்க நாடுகள் ஒன்றிணைந்து செயல்பட வேண்டிய அவசியத்தையும் வலியுறுத்துகிறது. Europol அமைப்பு பல நாடுகளின் தகவல் பரிமாற்றம் மற்றும் இணைந்த நடவடிக்கைகள் மூலம் இத்தகைய குற்றங்களை தடுக்கும் முயற்சிகளை தொடர்ந்து மேற்கொண்டு வருகிறது.