வெள்ளை கொடியுடன் சரணடைந்தவர்கள் படுகொலை செய்யப்பட்ட விவகாரங்கள் குறித்து உடனடி விசாரணை நடத்தி, முன்னாள் இராணுவ தளபதி பீல்ட் மார்ஷல் சரத் பொன்சேகாவை சாட்சியமாக அழைக்க வேண்டும் என தமிழரசு கட்சியின் மட்டக்களப்பு மாவட்ட நாடாளுமன்ற உறுப்பினர் ஞானமுத்து ஸ்ரீநேசன் தெரிவித்தார்.

நாடாளுமன்றத்தில் இன்று (திங்கட்கிழமை) நடைபெற்ற 2026 ஆம் ஆண்டுக்கான வரவு செலவுத் திட்டத்தின் இரண்டாம் வாசிப்பு விவாதத்தில் கலந்து கொண்டு உரையாற்றிய அவர், கடந்த கால யுத்தக் குற்றச்சாட்டுகள் மற்றும் இனப் பிரச்சினைகள் குறித்து அரசாங்கம் நடவடிக்கை எடுக்க வேண்டிய அவசியத்தை வலியுறுத்தினார்.

அவர் கூறியதாவது:

“இந்த நாட்டில் நீண்ட காலமாக நிலவி வரும் தேசிய இனப் பிரச்சினை தீர்க்கப்பட வேண்டும். அது தீர்க்கப்பட்டால், நாட்டின் பொருளாதார முன்னேற்றத்துக்கும் பெரும் பயன் கிடைக்கும். யுத்தம் முடிந்து 16 ஆண்டுகள் ஆனபோதும், இன்னும் பல உண்மைகள் வெளிச்சம் பார்க்கவில்லை,” என்றார்.

அவர் மேலும் கூறினார்:

“பீல்ட் மார்ஷல் சரத் பொன்சேகா பல முறை ஊடகங்களில் யுத்தக் குற்றச்சாட்டுகள் குறித்து வாக்குமூலம் வழங்கியுள்ளார். அவர் கூறியதுபடி, இசைப்பிரியா எனும் ஊடகவியலாளர் பாலியல் வன்கொடுமைக்கு உட்படுத்தப்பட்டு கொலை செய்யப்பட்டதாகவும், அதற்கு காரணமாக புலனாய்வு பணிப்பாளர் கபில ஹெந்தவிதாரண மற்றும் ஜகத் ஜயசூரிய போன்றோர் இருந்ததாகவும் தெரிவித்துள்ளார்.”

“மேலும், வெள்ளை கொடியுடன் சரணடைந்தவர்களை கொன்றதில் சவேந்திர சில்வா உள்ளிட்டோர் தொடர்புடையதாக சரத் பொன்சேகா கூறியுள்ளார். அவர் தானே இந்த விடயங்களில் சாட்சியமாக பேசத் தயாராகியுள்ள நிலையில், அரசாங்கம் இதை விசாரிக்கத் தவற கூடாது,” என வலியுறுத்தினார்.

ஸ்ரீநேசன் மேலும் தெரிவித்தார், கடந்த காலங்களில் வடக்கு மற்றும் கிழக்கில் பாலியல் வன்கொடுமைகள், காணாமல் ஆக்கப்பட்டவர்கள், அரசியல் கைதிகள் மற்றும் காணி அபகரிப்புகள் போன்ற விடயங்களும் இன்னும் நீதி காணவில்லை என்று.

“தேசிய மக்கள் சக்தி அரசுக்கு இப்போது போர்க்குற்ற சாட்சியங்கள் தானாகவே கிடைத்துள்ளன. எனவே, இந்த விடயங்களை உண்மையாகவும் நியாயமாகவும் விசாரிக்க இந்த அரசு நடவடிக்கை எடுக்க வேண்டும்,” என அவர் தெரிவித்தார்.