லண்டனில் உள்ள இஸ்ரேல் தூதரகத்தில் ஆயுதங்களுடன் நுழைந்து தாக்குதல் நடத்த முயன்றதாக குற்றம் சாட்டப்பட்ட குவைத் நாட்டைச் சேர்ந்த அப்துல்லா அல்பாத்ரி (34) என்பவரை பிரிட்டன் நீதிமன்றம் பயங்கரவாத குற்றங்களில் குற்றவாளியாக அறிவித்துள்ளது.
2025 ஏப்ரல் மாதம் நடந்த லண்டன் இஸ்ரேல் தூதரக தாக்குதல் சம்பவத்தில் அவர் லண்டன் நகரில் தூதரகத்தை நோக்கி நீண்ட தூரம் பயணம் செய்து வந்ததாகவும் முகத்தை மறைக்கும் உடை மற்றும் சூரியக்கண்ணாடி அணிந்திருந்ததாகவும் நீதிமன்றத்தில் தெரிவிக்கப்பட்டது.
அவர் தன்னுடன் இரண்டு கத்திகளை வைத்திருந்தார் என்றும் தூதரக வளாகத்திற்குள் ஏறி நுழைய முயன்றபோது பாதுகாப்பு அதிகாரிகள் உடனடியாக தடுத்து கைது செய்தனர் என்றும் விசாரணையில் கூறப்பட்டது.
பிராசிகியூஷன் தரப்பு அவர் “காசா பகுதியில் குழந்தைகள் கொல்லப்பட்டதற்காக பழிவாங்கும் நோக்கத்தில்” இந்த தாக்குதலை திட்டமிட்டதாகவும் அவரிடம் “மார்ட்டிர்டம் நோட்” எனப்படும் குறிப்பு இருந்ததாகவும் தெரிவித்தது.
அல்பாத்ரி தன் பக்கம் கூறுகையில் தன்னிடம் இருந்த கத்திகள் வீதியில் வாழ்ந்தபோது தனிப்பாதுகாப்புக்காக வைத்திருந்ததாகவும் தாக்குதல் திட்டம் எதுவும் இல்லை என்றும் வாதிட்டார்.
ஆனால் ஜூரி அவரது விளக்கத்தை நிராகரித்து, பயங்கரவாத தாக்குதல் திட்டமிடல் மற்றும் ஆயுதம் வைத்திருந்த குற்றங்களில் அவரை குற்றவாளி என தீர்ப்பளித்தது.
இந்த தீர்ப்பு லண்டன் நீதிமன்றத்தில் அறிவிக்கப்பட்டது. தற்போது அவருக்கு தண்டனை அறிவிக்கப்பட உள்ள நிலையில் அவர் காவலில் வைக்கப்பட்டுள்ளார். இந்த வழக்கு பிரிட்டனில் பாதுகாப்பு அச்சுறுத்தல்கள் அதிகரித்து வரும் சூழ்நிலையில் பரபரப்பை ஏற்படுத்தியுள்ளது.
