புதிய CEAS அகதி விதிமுறைகள்
ஐரோப்பிய ஒன்றியத்தின் (EU) புதிய Common European Asylum System (CEAS) எனப்படும் அகதி மற்றும் குடியேற்றச் சட்டத் தொகுப்பு 2026 ஜூன் 12 முதல் அதிகாரப்பூர்வமாக அமலுக்கு வந்துள்ளது. பல ஆண்டுகளாக நடைபெற்ற பேச்சுவார்த்தைகளுக்குப் பிறகு அறிமுகப்படுத்தப்பட்ட இந்த புதிய அமைப்பு அகதி விண்ணப்பங்களை விரைவாக பரிசீலிப்பது எல்லைப் பாதுகாப்பை வலுப்படுத்துவது மற்றும் உறுப்புநாடுகளுக்கிடையிலான பொறுப்புப் பகிர்வை மேம்படுத்துவது ஆகியவற்றை நோக்கமாகக் கொண்டுள்ளது.

புதிய விதிகளின் கீழ் ஐரோப்பிய ஒன்றியத்தின் வெளிப்புற எல்லைகளை சட்டவிரோதமாகக் கடந்து வரும் அனைவரும் கட்டாயமாக பதிவு செய்யப்படுவார்கள். அவர்களின் அடையாளம் பாதுகாப்பு நிலை உடல்நல நிலை மற்றும் பாதிக்கப்படக்கூடிய சூழ்நிலைகள் பரிசோதிக்கப்படும். இந்த ஆரம்பச் சோதனை பொதுவாக 7 நாட்களுக்குள் நிறைவேற்றப்பட வேண்டும்.

குறைந்த அளவில் அகதி பாதுகாப்பு வழங்கப்படும் நாடுகளிலிருந்து வரும் விண்ணப்பதாரர்கள் அல்லது பாதுகாப்பு ஆபத்து என கருதப்படுவோர் மீது வேகமான எல்லை நடைமுறைகள் (Fast-Track Border Procedures) பயன்படுத்தப்படலாம். இந்த நடைமுறையின் போது அவர்கள் எல்லைப் பகுதிகளில் தங்க வைக்கப்பட்டபடியே அவர்களது விண்ணப்பங்கள் பரிசீலிக்கப்படும். இதனால் சிலரின் விண்ணப்பங்கள் மிகக் குறுகிய காலத்திலேயே நிராகரிக்கப்படவும் வாய்ப்புள்ளது.

மேலும், புதிய CEAS அகதி விதிமுறைகள் Dublin Regulation என அறியப்பட்ட பழைய பொறுப்புப் பகிர்வு முறை மாற்றப்பட்டு புதிய Asylum and Migration Management Regulation (AMMR) அறிமுகப்படுத்தப்பட்டுள்ளது. இதன் மூலம் எந்த உறுப்புநாடு ஒரு அகதி விண்ணப்பத்தை பரிசீலிக்க வேண்டும் என்பது தெளிவாக நிர்ணயிக்கப்படும். அதேசமயம் அதிக அகதி வருகையை எதிர்கொள்ளும் நாடுகளுக்கு மற்ற உறுப்புநாடுகள் நிதி தொழில்நுட்ப உதவி அல்லது இடமாற்ற உதவி வழங்க வேண்டிய கட்டாய ஒற்றுமை முறை (Solidarity Mechanism) அமல்படுத்தப்பட்டுள்ளது.

மனித உரிமை அமைப்புகள் இந்த புதிய சட்டங்கள் அகதி கோருநர்களின் உரிமைகளை பலவீனப்படுத்தக்கூடும் என எச்சரித்துள்ளன. குறிப்பாக எல்லைப் பகுதிகளில் நீண்டகால தடுத்து வைப்பு விரைவான முடிவெடுப்பு மற்றும் மேல்முறையீட்டு வாய்ப்புகள் குறைவது போன்ற அம்சங்கள் கவலைக்குரியதாகக் கூறப்படுகின்றன. எனினும் குழந்தைகள் மற்றும் பாதிக்கப்படக்கூடிய நபர்களுக்கான சில கூடுதல் பாதுகாப்பு ஏற்பாடுகளும் இதில் இடம்பெற்றுள்ளன.

ஐரோப்பிய ஒன்றியத்தின் இந்த புதிய CEAS அமைப்பு எதிர்காலத்தில் அகதி கோரிக்கைகள் எவ்வாறு கையாளப்படுகின்றன என்பதை குறிப்பிடத்தக்க வகையில் மாற்றும் என்று எதிர்பார்க்கப்படுகிறது. இருப்பினும் அனைத்து உறுப்புநாடுகளும் இந்த புதிய விதிமுறைகளை முழுமையாக நடைமுறைப்படுத்தத் தயாராக இல்லை என்பதால் ஆரம்ப கட்டங்களில் சவால்கள் தொடரலாம் என நிபுணர்கள் தெரிவிக்கின்றனர்.