பாரிஸ் மற்றும் அதன் புறநகர் பகுதிகளில் இயக்கப்படும் RER C ரயில் பாதையில் நடைபெறும் பராமரிப்பு மற்றும் கட்டுமானப் பணிகளின் காரணமாக மார்ச் 7 மற்றும் 8 ஆகிய தேதிகளில் பல இடங்களில் ரயில் சேவைகள் பாதிக்கப்படுகின்றன.

மார்ச் 8 வரை Issy நிலையத்தில் ரயில்கள் முழு நாளும் செல்லாது என்று போக்குவரத்து அதிகாரிகள் அறிவித்துள்ளனர். மார்ச் 7 சனிக்கிழமை இரவு 9 மணி முதல் Gare d’Austerlitz – Dourdan இடையிலான ரயில் சேவை தற்காலிகமாக நிறுத்தப்படுவதுடன் பயணிகளுக்காக மாற்று பேருந்து சேவைகள் ஏற்பாடு செய்யப்பட்டுள்ளது.

அதே நாளில் மாலை நேரத்தில் Saint-Martin d’Étampes – Gare d’Austerlitz இடையிலும் ரயில் சேவை நிறுத்தப்பட்டு பேருந்துகள் இயக்கப்படுகின்றன. மேலும் மார்ச் 7 மற்றும் 8 ஆகிய வார இறுதி நாட்களில் முழுவதும் Champ de Mars – Pontoise இடையிலான ரயில் சேவையும் நிறுத்தப்படுவதால் பயணிகள் மாற்று பாதைகளை பயன்படுத்துமாறு அறிவுறுத்தப்பட்டுள்ளது.

இதே வார இறுதியில் மாலை நேரங்களில் Javel – Versailles Château இடையிலான சேவையும் தற்காலிகமாக நிறுத்தப்படும். இதனுடன் பாதை பராமரிப்பு பணிகளின் காரணமாக Juvisy – Choisy-le-Roi இடையே ரயில்கள் நேரடியாக இயக்கப்படுவதால் Athis-Mons, Ablon, Villeneuve-le-Roi நிலையங்களில் ரயில்கள் நிற்காது.

இந்த நிலையங்களை பயன்படுத்தும் பயணிகளுக்காக மாற்று பேருந்துகள் இயக்கப்படுகின்றன. மேலும் மார்ச் 7 மற்றும் 8 மாலை நேரங்களில் Juvisy – Paris Austerlitz இடையிலான ரயில் சேவையும் நிறுத்தப்பட்டு பேருந்து சேவைகள் வழங்கப்படும்.

இதற்கு பிறகும் பணிகள் தொடர்ந்து நடைபெறுவதால் மார்ச் 9 முதல் மார்ச் 13 வரை வார நாட்களின் மாலை நேரங்களில் Javel – Versailles Château / Versailles Chantiers இடையிலான ரயில் சேவை நிறுத்தப்படும். மேலும் மார்ச் 27 வரை வார நாட்களில் மாலை நேரங்களில் Juvisy – Paris Austerlitz இடையிலான ரயில் சேவை நிறுத்தப்பட்டு மாற்று பேருந்துகள் இயக்கப்படும்.

அதேபோல் ஏப்ரல் 3 வரை வார நாட்களின் மாலை நேரங்களில் Avenue Henri Martin – Pontoise, Saint-Martin d’Étampes – Paris Austerlitz, Dourdan – Paris Austerlitz, மற்றும் Paris Austerlitz – Pont de Rungis இடையிலான ரயில் சேவைகளும் கட்டுமானப் பணிகளால் இடைநிறுத்தப்பட்டுள்ளன. எனவே இந்த பாதைகளை பயன்படுத்தும் பயணிகள் முன்கூட்டியே தங்கள் பயணத்தை திட்டமிட்டு மாற்று போக்குவரத்து வசதிகளை பயன்படுத்துமாறு அதிகாரிகள் அறிவுறுத்தியுள்ளனர்.