ஈரான் நாட்டின் அணுசக்தி திட்டம் குறித்து மறைமுக பேச்சுவார்த்தைகள் தொடர்ந்து நடைபெற்று வரும் நிலையில், அந்த நாட்டுக்கு எதிராக வரையறுக்கப்பட்ட இராணுவத் தாக்குதல்கள் மேற்கொள்ளப்படலாம் என அமெரிக்க ஜனாதிபதி டொனால்ட் டிரம்ப் எச்சரித்துள்ளார். பேச்சுவார்த்தைகள் நடைபெற்று கொண்டிருக்கும் போதும் அமெரிக்கா நடவடிக்கை எடுக்குமா என்ற நிருபரின் கேள்விக்கு பதிலளித்த அவர், “நான் அதை பரிசீலித்து வருகிறேன் என்று சொல்லலாம்” என்று தெரிவித்தார்.

இந்த கருத்து, சுவிட்சர்லாந்தின் ஜெனீவாவில் நடைபெற்ற சமீபத்திய அணுசக்தி பேச்சுவார்த்தைகளுக்குப் பின்னர் வெளியிடப்பட்டுள்ளது. அந்த பேச்சுவார்த்தைகளில், ஈரானின் வெளியுறவு அமைச்சர் அப்பாஸ் அரக்சி, வாஷிங்டனுக்கு அனுப்புவதற்கான ஒரு வரைவு ஒப்பந்தத்தை சில நாட்களுக்குள் தயாரிக்கத் தயாராக இருப்பதாக தெரிவித்தார். இது பேச்சுவார்த்தைகளில் முன்னேற்றம் ஏற்பட்டிருக்கலாம் என்ற எதிர்பார்ப்பை உருவாக்கியுள்ளது.

இந்நிலையில், “அர்த்தமுள்ள” ஒப்பந்தத்தை எட்ட ஈரானை அழுத்தம் கொடுக்க அமெரிக்கா மத்திய கிழக்கில் தனது இராணுவ இருப்பை அதிகரித்துள்ளது. மேலும், ஒரு ஒப்பந்தத்தை எட்டுவதற்கு 10 முதல் 15 நாட்கள் வரை காலக்கெடு வழங்கப்பட்டுள்ளதாகவும், இல்லையெனில் “மிகவும் மோசமான விளைவுகள்” ஏற்படலாம் எனவும் டிரம்ப் எச்சரித்துள்ளார். இது இராஜதந்திர முயற்சிகளுடன் சேர்த்து இராணுவ விருப்பங்களும் பரிசீலனையில் இருப்பதை காட்டுகிறது.

ஆனால், ஈரான் தனது அணுசக்தி திட்டம் அமைதியான நோக்கத்திற்காகவே என தொடர்ந்து வலியுறுத்தி வருகிறது. நல்லெண்ணத்துடன் பேச்சுவார்த்தைகளில் ஈடுபடத் தயாராக இருப்பதாகவும் தெரிவித்துள்ளது. இருப்பினும், யுரேனியம் செறிவூட்டல் மற்றும் பாதுகாப்பு தொடர்பான முக்கிய அம்சங்களில் இரு தரப்புக்கும் இடையில் கருத்து வேறுபாடுகள் நீடித்து வருகின்றன.

இதற்கிடையில், அமெரிக்கா தாக்குதல் நடத்தும் எந்த நடவடிக்கையும் ஈரானின் பதிலடி நடவடிக்கையை தூண்டக்கூடும் என்றும், அது பிராந்தியத்தில் பெரிய அளவிலான மோதலாக மாறும் அபாயம் இருப்பதாகவும் ஆய்வாளர்கள் எச்சரித்துள்ளனர்.