சிறிலங்கா பொதுஜன பெரமுனவின் தேசிய அமைப்பாளரும், நாடாளுமன்ற உறுப்பினருமான நாமல் ராஜபக்ச, காவல்துறை மா அதிபர் (IGP) மீது கடுமையான விமர்சனங்களை முன்வைத்துள்ளார்.

தேசிய மக்கள் சக்தியைச் சேர்ந்த நாடாளுமன்ற உறுப்பினர் ஒருவர் காவல்துறை அதிகாரிகளை தாக்கியதாகக் கூறப்படும் சம்பவம் தொடர்பில் ஊடகங்களுக்கு கருத்து தெரிவிக்கும் போதே அவர் இந்த விமர்சனங்களை வெளியிட்டார்.

காவல்துறையினருக்கு தாக்குதல் – கடும் கண்டனம்

வீதிகளில் காவல்துறை அதிகாரிகளைத் தாக்கியதாகக் கூறப்படும் நாடாளுமன்ற உறுப்பினர்களைக் கொண்ட அரசாங்கத்திற்கு சேவை செய்ய காவல்துறை அதிகாரிகள் வெட்கப்பட வேண்டும் என நாமல் ராஜபக்ச தெரிவித்துள்ளார்.

தேசிய மக்கள் சக்தி நாடாளுமன்ற உறுப்பினர் சாந்த பத்மகுமார தொடர்பான தாக்குதல் குற்றச்சாட்டு குறித்து கருத்துரைத்த அவர், தற்போதைய காவல்துறை மா அதிபர் நாட்டின் சட்ட அமலாக்கத் தலைவராக அல்ல, மாறாக தேசிய மக்கள் சக்தி அரசாங்கத்தின் காவல்துறை மா அதிபராகவே செயல்படுவதாக குற்றஞ்சாட்டினார்.

அரசியல் அழுத்தம் – சுயாதீனம் கேள்விக்குறி

இதுபோன்ற சம்பவங்கள், அரசியல் அழுத்தம் மற்றும் பழிவாங்கல் அச்சம் காரணமாக காவல்துறை அதிகாரிகள் தங்கள் கடமைகளை சுயாதீனமாக நிறைவேற்ற முடியாத சூழ்நிலையை உருவாக்கியுள்ளதாகவும் அவர் சுட்டிக்காட்டினார்.

மேலும், ஒரு காலத்தில் ராஜபக்ச குடும்பத்தினரை போதைப்பொருள் தொடர்பான குற்றச்சாட்டுகளுடன் இணைத்துப் பேசிய நாடாளுமன்ற உறுப்பினர்கள், தற்போது கஞ்சா அறுவடை மற்றும் போதைப்பொருள் தொடர்பான நடவடிக்கைகளுடன் இணைக்கப்படுவதாகவும் நாமல் ராஜபக்ச குற்றம் சாட்டியுள்ளார்.

சட்ட அமலாக்கத்தில் அரசியல் தலையீடு?

சட்டத்தை நடைமுறைப்படுத்துவதில் அரசியல் அதிகாரம் பயன்படுத்தப்படுவதாகவும், இத்தகைய குற்றச்சாட்டுகள் தொடர்பில் காவல்துறை மா அதிபர் மௌனம் காக்கும் நிலை பல சந்தேகங்களை எழுப்புவதாகவும் அவர் தெரிவித்தார்.