இதற்கிடையில் உலக சுகாதார நிறுவனம் (WHO) இந்த எபோலா பரவல் நிலைமையை குறைத்து மதிப்பிடக்கூடாது என்று எச்சரித்துள்ளது. குறிப்பாக காங்கோ ஜனநாயகக் குடியரசில் பரவி வரும் அரிதான Bundibugyo வகை எபோலா வைரஸ் காரணமாக பிராந்திய ரீதியிலான ஆபத்து அதிகரித்துள்ளதாக கூறப்படுகிறது. இந்த வைரஸுக்கு இதுவரை அங்கீகரிக்கப்பட்ட தடுப்பூசி அல்லது குறிப்பிட்ட சிகிச்சை இல்லாத நிலையும் சவாலாக பார்க்கப்படுகிறது.
உகாண்டா அரசு தற்போது நோயாளிகளுடன் தொடர்புடையவர்களை தீவிரமாக கண்காணித்து வருகிறது. பொதுமக்கள் காய்ச்சல், உடல்வலி, வாந்தி, பலவீனம் போன்ற அறிகுறிகள் தென்பட்டால் உடனடியாக மருத்துவ உதவியை நாடுமாறு அதிகாரிகள் அறிவுறுத்தியுள்ளனர். ஆப்பிரிக்கப் பிராந்தியத்தில் இந்த புதிய பரவல் மேலும் தீவிரமடையுமா என்ற அச்சம் சர்வதேச அளவில் அதிகரித்துள்ளது.
